TACLOBAN CITY – Abuyon an pira nga mga tinaglawas hiton kasundaluhan kasumpay ha pagpapatuman han mandatory ROTC ha ilarom han Marcos administration para ha mga estudyante han grade 11 ngan 12.
Sumala kan Col. Castor Bahin, Group Commander han 8RCDG Reserve Command, han Philippine Army, nga ine in makakabulig nga makag-hatag hin disiplina ha mga estudyante ilabi na yana nga presente nga panahon.
Makakabulig gihapon ine dire la para ha benepisyo han Pilipinas, kundi ha kada-personal nga pagkinabuhi han mga kabataan yana in iba na an ira panlantaw ha makabag-o nga panahon.
Dugang pa han mao nga opisyal, ine in agud nga mabuligan an kabatan-unan nga mahibaro higugmaon an nasod Pilipinas, ngan maghatag hin respeto ha mga tradisyunal nga hirimuon sugad han pagkanta hin sakto han Lupang Hinirang ngan damo pa nga iba.
Mababaruan, nga kadam-an yana nga mga bag-o nga henerasyon in puros la cellphone iton kinaptan, bisan nga nakaka-bati an mga ine han national anthem in dire naghahatag hin pag respeto.
Ginmalatumat pa hine, nga nawawara an sense of nationalism han makabag-o nga kabataan han ira pagigin Pilipino.
Sanglit nanawagan an mao nga opisyal, ha ngatanan nga sangay hiton gobyerno nga burubligan nga igbalik pagtutdo ha mga kabataan sugad hiton pagrespeto ngan paghatag hin disiplina ha mga ine, matungod nga hira an masaliwan nga magigin lider han mga masunod nga panahon.
