TACLOBAN CITY – Ginpahayag han pira nga mga negosyante ha syudad han Talcoban nga nagtikang na an pira nga mga establishmento ha pagpatuman hin price increase haira mga produkto partikular na ha mga kaunan o fast food.
Sumala kan Hon. Colai Go, tagapagyakan han Tacloban Filipino Chinese Chamber of Commerce Inc., an pira nga mga establishmento sugad han mga kaunan o restaurant ha syudad in nagtikang na han ira mga price adjustments tungod han paghitaas han presyo han mga raw materials nga ira gingagamit sugadman an hitaas nga presyo han produktong petrolyo.
Ha kaluyo hini in ginsisiguro naman han mga ini nga minimum la an ira price adjustments tikang 5 pesos nga 10 pesos agud nga dire makalasan hin duro an mga konsumidor.
Kanya kanya gihapon hin diskarte an mga establishmento kun diin pira han mga ini in ha serving nala han kada pagkaon o produkto nag-iiban imbes nga magpahitaas han presyo hini.
Andam naman daw an mga establishmento ngan mga negosyante nga bumalik o magpaubos han ira mga presyo kun bumalik na gihapon ha normal an mga presyo han ira mga raw materials sugadman maging stable na utro an presyo han produktong petrolyo.
