TACLOBAN CITY – Temporaryo nga ginsadhan an pipira nga karsada ha Eastern Samar tungod han pagbabaha ngan posibilidad nga magkaada hin landslide tungod han pag inuran nga durot han Tail-End of a Frontal System.
Sumala kan Engr. Jayson Espeso, information officer han Department of Public Works and Highways – Eastern Samar District Engineering Office ( DPWH – ESDEO ) ala una kakulop, Enero 10 ginsara an Camp 5 Boundary – Junction Taft nga dalan ha Brgy. Binaloan han Taft Eastern Samar.
Nagkaada naman hin rockfall ha national road han Brgy. San Rafael, Taft, Eastern Samar nga ginbabana bana aada ha 1 cubic meter nga usa liwat ha mga rason kon kay ano nga ginsara an Camp. 5 Boundary – Junction Taft nga karsada.
Gin abisuhan naman an mga motorista tikang ha Tacloban tikadto ha Borongan ngan Taft-Arteche via Wright-Taft nga umagi ha alternate route ha Junction. Buenavista-Lawaan-Marabut Road ngan vice versa.
Nagpapabilin gihapon nga impassable ha tanan nga klase hin sarakyan an Arteche -Jipapad – Las Navas – Rawis Road ha Brgy. Bigo, Arteche, Eastern Samar tungod hiton pagbabaha.
An mga motorista tikang ha Arteche tikadto ha Jipapad, in gin abisuhan nga umagi ha alternate route via Brgy. Imelda, Lapinig-Jipapad Road.
Ginsiguro naman han DPWH – Eastern Samar District Engineering Office nga aabrehan ha mga umaragi ini nga mga karsada kon magin maupay na an panahon.
Naka-standby naman an ira mga personnel para ha padayon nga monitoring ngan ha pagbubuhaton nga mga clearing operations.
