TACLOBAN CITY – Kadungan han pagpatuman han Executive Order No. 39 o Price Ceiling ha ngatanan nga merkado hiton bugas in nagsarado naman an pira nga mga bugasan ha syudad, samtang an iba naman in ginpanago la anay an stock han mga well-milled ngan regular milled rice.
Yana nga adlaw gudman nagin epektibo an pagpapatuman han price ceiling han mga well-milled ngan regular milled nga mga bugas ha bug-os nga nasud kun diin aada ha P41 an ginpatuman nga presyo han regular milled rice ngan P45 naman para ha well-milled rice.
Sumala kan Frederick Dy, Presidente hiton Grains Retailers Confideration (GReCon) han Eastern Visayas, makuri ha ira nga mga retailers an nasabi nga panhitabo mahitungod nga mahal an ira kuha han mga bugas pero kinahanglan nira nga igbaliya ha barato nga presyo.
Dugang pa hine, aadi daw ha mga gudti nga magpapakabuhi ginpapasa iton dapat in problema hiton gobyerno.
Mayda naman daw hinabang nga ighahatag iton gobyerno ha mga retailers pero bangin daw dire ine maka-insakto ha kalugian nga makukuha hiton mga retailers.
Makuri pa daw hine kay mahitungod nga waray pa lokal nga suplay han regular milled rice in kumumpra la anay hira hin imported nga bugas kun diin an nakabutang daw nga label ha mga sako in premium rice pero ha pag-abrihi hine in regular milled rice iton mga sulod, dire naman daw ine nira mahibaligya hin kanan premium rice nga presyo sanglit nakadugang pa ine haira pagkalugi.
