TACLOBAN CITY – Pira nga kadagatan ha rehiyon an ada yana ha ilarom han local red tide warning ngan shellfish ban.
Ine in sumala kan Bureau of Fisheries and Aquatic Resources Eastern Visayas Information Office, Christine Gresola.
Positibo ha red tide toxin o an gintatawag nga saxitoxin an mga unod han ginkolekta nga pangti-on tikang ha kadagatan han Zumarraga, Samar.
Mahitungod hine in igin pailarom an nasabi nga kadagatan ha Local Red Tide Warning kumo pag-ikmat agud maproteheran an ngatanan ha posible nga kadelikaduhan nga durot han pagkaon han mga pangti-on nga tikang ha nasabi nga lugar.
Karuyag sidngon, igindidire an panguha, pagkaon, ngan pangolekta han ngatanan nga klase hin pangtion ngan alamang o hipon tikang ha nasabi nga dagat.
Nagpapabilin naman nga ada ha kaparehas nga warning an Cancabato Bay han Tacloban City ngan Irong-irong Bay han Catbalogan City.
Ine naman in mahitungod nga nagpapabilin nga positibo ha Pyrodinium bahamense an filtered seawater samples nga ginkolekta ha nasabi nga mga kadagatan.
Samtang, ada naman ha ilarom han Shellfish Ban an Matarinao Bay nga nasakop han mg kadagatan ha General MacArthur, Quinapondan, Hernani, ngan Salcedo, Eastern Samar.
Kun diin mas mahugot nga igindidire an pagkunsumo, panguha, ngan pagbiyahe han ngatanan nga klase hin pangti-on ngan alamang.
Pwede naman igkonsumo an isda, pasayan, nuos, ngan masag basta siguraduhon la nga presko an mga ine ngan tatanggalan han ira mga laman-loob sugad han tina-e, hasang, ngan huhugasan hin maupay gamit an running water.
