TACLOBAN CITY–Ginbaton han pira ka maguturtdo ha Sinirangan Bisayas an kontrobersyal nga komento ni anay Uuniversity of the Philippines (UP) professor ngan anay national security adviser ni Pangulong Ferdinand Marcos Jr. nga hi Clarita Carlos.
Una hine ginpahayag ni Carlos ha social media han ika 13 han Pebrero, nga bisan nga naka-aricon an mga classroom kun an magturotdo in hamubo an hibaro, waray la gihapon ine gamit matungod nga waray gihapon mahihibaruan an mga estudyante.
Sumala kan Edgardo Carola, usa nga magturutdo han Music Arts Physical Education and Health (MAPEH) ngan Level 6-10 Social Studies, dire hiya nagtutuo nga an mga magturotdo in hamubo an hibaro, lugod an mga ine in baltok ngan madiskarte.
Dugang pa niya nga dire ensakto an pag-generalize ha usa nga komplikado ngan seryoso nga propesyon.
Ha lain naman nga bahin, ginpaangbit ni Carola nga nakaabat hiya hin kakulangan han mga kinahanglan ha sulod hiton eskwelahan, sugad han kuryente ngan lingkoran, kawaray hin internet.
Nanawagan naman hi Carola ha Deparment of Education (DepEd) nga tagan hin atensyon an kakulangan ha mga gamit mahitungod mas makakag-aram an mga estudyante ngan dire na magkukuri an mga magturutdo ha ira panutduan kun kumpleto an mga resources.
