SOGOD, SOUTHERN LEYTE – Nakumpirma ha Sogod, Southern Leyte an pinakasyahan nga kaso han mpox (monkeypox) ha Sinirangan Bisayas, ine an gin anunsyo ni Sogod, Southern Leyte Mayor Sheffered Tan.
Subay ha datos tikang ha Sogod Rural Health Unit, an pasyente in usa nga 28-anyos nga babaye nga taga-Brgy. Zone 2 han nasabi nga bungto — waray travel history ngan nagtikang paka-eksperyensya han mga sintomas dida pa han Mayo 9 han presente nga tuig.
Ugsa paman ine, usa nga 9-anyos nga bata nga kaupod hine ha balay an syahan na nga nagpakita hin sintomas han mpox pero ha yana in fully recovered na ine.
Dayun naman nga gin-swab test han Department of Health an 28-anyos nga babaye, ngan dida han Lunes, Hunyo 16 pala umabot an resulta han test nga ginpahibaro naman ha RHU Sogod.
Samtang, sumala kan Dr. Marjorette Mosot han RHU, waray angay igkabaraka an publiko mahitungod nga dayun nga gin-isolate an pasyente ngan yana in ada na maupay nga kabutang.
Nanawagan naman hi Mayor Tan ha publiko nga magpabilin nga kalmado, dire mag-panic, ngan makigsumpayan ha mga lokal nga healthcare workers para han sakto nga impormasyon.
Para han katalwasan ngan pagsigurado, nagbug-os an lokal nga pangobyernuhan han Sogod hin task force agud matutukan an pagkontrol ngan mapugngan an posible nga pagsarang ngan pagtapon han nasabi nga virus. (via Bombo Shiela Encio)
