Nakaandam an Philippine Bar Association (PBA) nga magserbi nga host para ha ginluluto nga public debate ha butnga nira anay Supreme Court Senior Associate Justice Antonio Carpio ngan Senator Rodante Marcoleta para ha “healthy discussion” kasumpay ha West Philippine Sea.
Kaupod ha mga andam ighatag han PBA an usa nga neutral ngan secure venue para ha media coverage ngan public access, professional moderators nga eksperto ha istoryahon sugadman ha constitutional ngan public law, klaro nga protocols ha dalagan han debate nga patas, pantay nga oras ngan decorum ngan maghahatag gihapon hin open access para ha accredited media ngan livestreaming arrangements agud masiguro an transparency.
Ginbuhat han grupo an pahayag mahuman kumasa hi anay Justice Carpio ha ayat ni Marcoleta para ha usa nga “friendly debate” kun diin iginrekomenda naman ni Carpio an paghingaday ha legal existence han WPS ngan estado han Kalayaan Island Group.
Subay ha gin isyu nga pahayag han PBA, importante an abri, may rason, ngan respeto nga balyuay hin mga panlantaw agud matagan hin hibaro an mga residente.
