METRO MANILA – Natuod hi Presidente Ferdinand Marcos Jr nga kun matatagan hin higayon an Pilipinas nga magin membro han United Nations Security Council (UNSC), dire la para ha pankalugaringon nga interes han nasud an lilingkuran hini nga papel kundi para na gihapon ha kapakanan han iba pa nga nasud.
Ini an gin pahayag ni Palace Press Officer USec. Claire Castro.
Dugang pa han opisyal han Palasyon, an boses ngan panuyo han nasud in igduso an pankalibutan nga katalwasan, kahimyangan, ngan seguridad kaupod an iba pa nga kaalyado nga estado han United Nations.
Pwede gihapon paghingadayan han Pilipinas ha Security Council an kalugaringon hini nga mga isyu ha nasyunal seguridad.
An Pilipinas in naghihingyap nga makakuha hin non-permanent seat ha United Nations Security Councial para ha termino han 2027-2028, kun diin nakatalaan nga pagbuhaton an pinilay ha Hunyo 3, 2026.
Kumo pangunahon nga sangay han United Nations nga mayda trabaho nga igpabilin an pankalibutan nga kahimyangan ngan seguridad, an UN Security Council in nagmamangulo gihapon ha mga sitwasyon nga nanginginahanglan hin peacekeeping operations ha magkadiru-dilain nga parte han kalibutan.
