TACLOBAN CITY – Nagpapadayon an gindudumara nga Psychological First Aid (PFA) han mga eksperto ha mga naapektaran nga istudyante han San Jose National High School mahuman an nahitabo nga pamusil dida han nakalabay nga bulan.
Sumala kan Department of Education Tacloban City Division Information Officer, Dr. Nilo Eder, damo nga mga ahensya ngan organisasyon padayon nga naghahatag hin magkadiru-dilain nga suporta ha ira mga istudyante agud mawara na an trauma han mga ini.
Usa gihapon han indikasyon nga nagpapabilin pa an kahadlok han mga ini, dida han utro nga magkagurumok an mga istudyante ha nasabi nga iskuylahan mahitungod han gugliat nga binati han pira nga istudyante nga naghuna-huna nga bag-o ini nga insidente.
Mahitungod hini, target han DepEd Tacloban City Division nga matagan o maipa-ilarom ha PFA an ngatanan nga istudyante han nasabi nga iskuylahan, sugadman in dire daw nira mapipirit an iba nga dire nakaruyag han nasabi nga interbensyon.
Ginpahayag naman ni Eder nga samtang mayda pa nanginginahanglan han nasabi nga bulig in magpapadayon pa hira paghatag hin PFA.
