TACLOBAN CITY– Ginpahibaro hiton Philippine Drug Enforcement Agency (PDEA-8), nga mayda hira yana bag-o nga kamanduhan, kun diin ha igpapagawas nga press release kasumpay hiton illegal nga droga, in dire na hira magpapagawas hin kantidad kun pira an balor han nakumpiska nga gintutuohan nga shabu.
Sumala kan Rogelette Urgel, Information Officer , PDEA Regional Office Vlll, ine in agud dire makag-aghat ha publiko nga magbaligya han nasabi nga produkto, nga kun diin nakakagdurot la ine hin pagkaguba han mga kinabuhi.
Dugang pa ni Urgel, an matatabo ha pagkayana in magpapagawas nala hira kun anu kadamo o kabug-aton an ira nakumpiskar nga droga, kalakip kun hino nga mga ahensya an nakadakop ha nasabi nga operasyon.
Ginklaro naman hine, nga madepende naman ha iba nga ahensya sugad hiton PNP kun hira in magpapagawas hin kantidad, matungod nga nakadepende ine ha kamanduhan han ira buhatan.
