TACLOBAN CITY – Ginpahayag han Philippine Coconut Authority (PCA) Region 8 nga may programa an ahensya para ha mga coconut farmers nga naapektaran yana an pakabuhi matungod hiton COVID-19 pandemic.
Sumala kan Joel Pilapil, Regional Manager han PCA Region 8, nga pinaagi han ira incentivized projects in matatagan hin insentibo nga 85 pesos an mga parag-uma ha kada puno hin lubi nga ira igtatanom.
Pupuydi gihapon nga magtanom hin puno hin saging ngan iba pa nga mga root crops ha bakante nga tuna ha butnga han kada lubi kun diin ha kada tanom/puno nga mabubuhi in may kabalyo nga 25 pesos nga insentibo.
Panuyo han mao nga proyekto nga matagan hin iba nga pagkukuhaan hin income an mga coconut farmers labi na yana nga may pandemya.
Limitado la naman ha .5 ngada 1 hectares an pupuydi nga ma enroll ha mao nga programa agud nga matagan liwat hin higayon nga makatagamtam an iba pa nga mga parag-uma.
Ginklaro naman han PCA nga ugsa nga matagan hin insentibo in kinahanglan anay nga masigurado nga stabilize na o kun nabuhi an igintanom nga puno.
