TACLOBAN CITY- Ginkalipay han pira nga mga parag-uma han lubi nga nag-umento na an kilo han kopra hine nga naglabay nga 3 ka bulan, kumpara han pagtikang pala han tuig 2021 in hamubo kaduro an kilo han mao nga produkto.
Sumala kan Joel Pilapil, Regional Manager han Philippine Coconut Authorization regional office 8, nga ine in dako nga bulig para han mga parag-uma han lubi ilabi na yana nga nagpapadayon pa an pandemya ha bug-os nga rehiyon 8.
Usa mangud ha mga gin-aaraba han mga parag-uma han lubi nga pahirihitas-an an presyo han kopra nga asya naman an ira pangunahon nga pakabuhi.
Hapagkayana in maabot na ha P42.00 an kada kilo han kopra kumpara han syahan nga hugna han tuig in maabot la ha P20.00 an kada kilo hine.
Naglalaom naman an pamunuan han PCA nga magpapadayon an sugad nga presyo matungod nga dako an nagigin epekto hine ha mga pamilya han parag-uma han lubi ha bug-os nga rehiyon.
