TACLOBAN -Personal nga gintambungan ni Pangulong Bongbong Marcos Jr. kaupod hi DPWH Sec. Vince Dizon an utro nga pag-abre han San Juanico Bridge yana nga adlaw.
Una hine, ginmando mangud han nakalabay nga pagbisita han presidente nga kinahanglan maibalik an normal nga biyahe ha nasabi nga tulay ugsa maghuman an tuig.
Ha nasabi nga kamanduhan, ginpaniguruhan naman ine han mga tinaglawas han Department of Public Works and Highways DPWH-8, kasugbong an iba pa nga mga ahensya nga ha sulod hiton 6 kabulan, mapahitaas- an iton load limit capacity nga pwede maka-tabok ha nasabi nga tulay.
Manunumduman nga han kaburubutngaan han tuig, tigda la nga naruba an tulay, ngan ginpatuman an 3 metric tons nga load limit an pwede la nga makatabok ha San Juanico.
Mababaruan nga umabot na hin P650M an inisyal nga nagamit ha paghingayad han tulay, kun diin ha pagkayana dire pa ine totally nga ayad, ngan ginlalauman nga maabot ha P1.1B an budget nga magagamit ha pag- retrofitting han nasabi nga tulay.
Sumala kan Pangulong Bongbong Marcos, ha pagkayana mayda ginbubug-os nga plano kaupod an alkalde han Tacloban nga hi Alfred Romualdez nga presente gihapon ha nasabi re-opening han San Juanico Bridge, ngan presente nga gintutugan nga makatabok adton mga sarakyan nga may kabug-aton nga 12-15 metric tons.
Subay hiton Presidente, posible nga igpatuman an one-way nga pag-agi han mga dagko nga cargo trucks hiton gab-i, matungod nga dire na duro ka-traffic.
An nasabi nga pitad in agud nga makatabok gihapon adton mga cargo trucks nga lahos ha nakatalaan nga 12-15 tons, ngan dire an mga ine madelatar han iya biyahe.
Ginlalauman naman han presidente nga ha 3rd quarter han tuig 2026, makaka-agi na hin two-ways an ada ha 33 metric tons nga mga sarakyan, ngan magigin fully-recovered na an San Juanico Bridge.
