Nanawagan hi Presidente Ferdinand “Bongbong” Marcos Jr. ha mga Pilipino nga ig tagad an paglaum, pagkakaurusa, ngan malasakit samtang ginseselebrar han ansud an Easter Sunday, nga nasimbolo ha utro nga pagkabanhaw ni Hesus Kristo ngan paghuhuman han Semana Santa.
Ha iya mensahe, ginmalatumat han Presidente nga nakikiusa hiya ha bug-os nga nasud ha pagselebrar han Dominggo han Pagkabanhaw, nga sumala pa haiya “kalangpusan han Semana Santa ngan baraan nga pagpapahayag han utro nga pagkabanhaw ni Kristo.”
Iginseselebrar han mga Kristyano nga Pilipino an nasabi nga adlaw hin mayda halarom nga debosyon ngan pagkalipay ha bug-os nga nasud kumo paghinumdom ha pagkabanhaw ni Hesus mahuman an usa kasemana nga pamalandong ngan pag-hahalad.
Gintagan-duon han Presidente nga an okasyon in nasimbolo han kalangpusan kontra ha kawaray paglaum ngan panibag-o nga karisyo pinaagi han pagtuo. Gin aaghat hini an mga katawhan nga igsabuhay an importansya hini pinaagi han kaupayan ngan urusa nga pagbaton agud makabug-os hin mas madig-on ngan nagkakaurusa nga nasud.
Sumala pa ha Presidente, an waray sulod nga lubnganan in pamatuod nga an kinabuhi in nagdaog kontra ha kamatayon ngan an paglaum in mas makusog kumpara ha pagkabaraka.
Gin aghat gihapon hini an mga Pilipino nga magbinuligay ha pagbug-os hin usa nga nasud kun diin natural an kabuutan ngan an pagkakaurusa an nagseserbi nga kusog han kada usa. Dugang pa, pinaagi han pagtuo, paghigugma ha nasud, ngan uusa nga panuyo, waray ayat nga dire malalahusan.
Gintagan-duon gihapon han Presidente an panuyo nga maiduso an Bagong Pilipinas kun diin an malasakit ngan pag-atiman ha igkasi an padayon nga maghuhulagway ha kinaiya han kada Pilipino.
Dugang pa niya, ha paglabay han mga henerasyon, iginpapahinumdom han Dominggo han Pagkabanhaw nga an sakripisyon in dire nakakawang ngan an pagkukuri in katikangan han panibag-o nga paglaum.
Ha katapusan, nanawagan an Presidente ha kada Pilipino nga bumakdaw nga mayda panibag-o nga panuyo, marig-on nga paglaum, ngan halarom nga pagbaton ha kada-tagsa, ngan igsabuhay an tumong han Dominggo han Pagkabanhaw ha kada-adlaw pinaagi han malasakit, pagkukusa, ngan pagkakaurusa.
