PALO, LEYTE – Utro nga ginmando ni Presidente Ferdinand Marcos Jr. ha Departmet of Public Works and Highways an pagpadagmit han retrofitting o pagpadig-on han San Juanico Bridge agud mapahitaas an load capacity hine tikang ha 3 metric tons ngada ha 12-15 metric tons yana nga Disyembre 2025.
Ha ginbuhat hine nga pahayag kadungan han grand launch han National Fiber Backbone (NFB) Phases 2 ngan Phase 3 ha Palo, Leyte, gintagan duon hine an importansya han madagmit nga rehabilitasyon han nasabi nga tulay, labi na nga padayon iton dako nga epekto hine ha mga residente, pan-negosyuhan, ngan mga biyaheros ha bug-os nga rehiyon.
Maabot naman ha P520 milyon an pondo nga gin alutaga ha paghingayad han tulay.
An nasabi nga pondo in tikang ha 2025 National Disaster Risk Reduction and Management Fund, nga syahan nga gin-hangyo han Eastern Visayas Regional Development Council.
Ha kaluyo han mga ayat in ginmalatumat han Presidente nga may-ada positibo nga pagbabag-o ha agos han trapiko ha San Juanico Bridge.
Subay ha report han Philippine Coast Guard, mas nagin madagmit an biyahe han mga importante nga kargamento, kun diin gin pa-prayoridad an mga madurunot nga kargamento ngan naghuhulat nala hin hin usa ngada duha ka-oras, samtang an dire naman madali madaot nga mga kargamento in nagkakamay-ada nala hin delay nga duha ngada ha upat kaoras.
Mas magaan daw ine kumpara han syahan niya nga pagbisita kun diin naabot hin tag-upat kaadlaw nga stranded an mga truckers ugsa makatabok ha Leyte o Samar.
Dugang pa han Presidente, panuyuan han gobyerno nga mahibalik ha mga masunod nga tuig an original nga load capacity han tulay nga 33 metric tons agud madungan ini ha nagtitika-hitaas nga ihap han mga kargamento, public transportations, ngan aktibidad pan-ekonomiya ha rehiyon. (via Bombo Shiela Encio)
