TACLOBAN CITY – Naghuman na han petsa 23 han Hulyo yana nga tuig an panrehistro para Barangay ngan SK elections yana nga maabot nga Desyembre 2022.
Sumala kan Atty. Ma. Gorette Cañas, Election Officer han Comelec Tacloban, nga han nakalabay nga semana in naghuman na an ira panrehistro para ha mga voters registrants, kun diin damo an mga pumakadto ha ira buhatan han urhi nga adlaw han panrehitro, rason nga waray na nira ka akomodar an ngatanan nga nakadto matungod han kadamo- ngan kahilaba an pila.
Dugang pa han mao nga opisyal, ira bana-bana nga maabot ha 8,000 an mga nagparehistro tikang han magtikang ine han Hulyo 4, kutob han Hulyo 23, kun diin nag-lahos na ngani an ira mga tinaglawas ha oras han ira mandato nga trabaho agud la nga maproseso an mga aplikante.
Waray naman kalikayi ha urhi nga adlaw han panrehistro an magkamayda hin mga reklamo, ilabi na an mga waray ka-akomodar nga aplikante nga pumila ngan namaghulat an mga ine para makapagparehistro.
Nag-aaro naman hin despinsa an buhatan han Comelec, para ha mga pumila nga waray ka-akomodar.
Mababaruan nga damo an mga na-nguli nga indibidwal matungod an mga ine in naabtan na han cut-off.
Ginpatapod naman han mao nga opisyal, nga pananglitan dire madayon an election yana nga Desyembre in utro an ira buhatan nga mag-aabre para ha mga magpaprehistro nga indibidwal para ha mga masunod nga eleksyon.
