TACLOBAN CITY – Gin anunsyo han Leyte Normal University an schedule han magigin 83rd Commencement Exercises yana nga tuig nga kun diin, pagbubuhaton ini ha sulod hin upat (4) nga magkasunod nga mga adlaw.
Ha iginpagawas nga impormasyon pinaagi han An Lantawan, an opisyal nga Student Publication han unibersidad, umabuyon an Senior Class Organization (SenCo) o an organisasyon han mga magradwar yana nga tuig ha nagin proposal han Management Committee (ManCom) nga pahalabaon an adlaw han Graduation yana nga tuig.
Sumala kan SenCO President Sarah Pino nga umagi hin serye hin mga meetings an nagin desisyon nira agud naman nga maakomodar ngan makasulod ha venue an graduates ngan pati han kag-anak hini, mapa Latin honor o non-honor man.
Humangyo naman hi Pino ha iya igkasi Normalista nga magradwar nga sumunod ha mga protocols nga igpapatuman durante han mga seremonyas agud nga magkaada hin maupay ngan mahinungdanon nga Commencement Exercises.
“Yana nga tuig, both parents na han with or without Latin honors an makakawitness ha Alba Hall mismo. Since 2 parents naman an allowed ha Alba Hall, may we strictly follow the rules nga ig-i-implement during graduation para maayos and memorable,” yakan ni Pino ha pakipaghimangraw han An Lantawan.
An graduation ceremony han College of Education- Elementary Education Department ngan an Bachelor of Elementary Education han San Isidro Campus (BEED-SI) in nakatalaan pagbuhaton ha Hunyo 10, 2025.
Samtang an College of Education- Secondary Education Department, Teacher Certificate Program (TCP), ngan Bachelor of Science in Entrepreneurship tikang ha San Isidro Campus (BS Entrep-SI) in Hunyo, 11, 2025.
An College of Arts and Sciences ngan an Graduate School ha Enero 17, 2025, An College of Management and Entrepreneurship ha Hunyo 18, 2025.
Iginkalipay naman hini han mga estudyante ngan mga kag-anak.
Via An Lantawan (https://www.facebook.com/share/p/1EbibMc8uz/)
