TACLOBAN CITY – Guinduon han pira nga kapulisan nga waray konkreto nga balaod para magdakop han mga nadadabi ha vote buying ngan vote selling ha mga higayon han piniliay.
Guinmalatumat ni PCI Joselito Villas, hepe han Palo PNP nga may nagreport ha ira buhatan may kalabutan han guin aalegar nga panmalit hin botos han pira nga mga kandidato ha iya nasasakupan nga lugar pero diri ini basta basta nga magkadadakop mahitungod nga waray naman daw balaod nga illegal possession of money nga pwede nga maipasaka ha usa nga tawo.
Dugang pa ni PCI Villas nga may nakarawat liwat hira nga reklamo may kalabutan han guin aalegar nga panhakot han mga botante kun diin nagdepensa naman an mga ini nga boluntaryo la hira nga sumakay han vehiculo para dagmit nga dumangat ha area nga nakatalaan nga bomotar.
Mababaruan nga guinpa blotter mismo an mao nga hepe han Palo PNP mahitungod nga waray daw hini aksyuni an guinpaabot nga reklamo han mga concerned citizen.
