TACLOBAN CITY — Posible nga mas makaeksperyensya hin pagsaka ha presyo han mga papliton an mga konsumidor tungod han padayon nga pagluya han piso kontra dolyar.
Sumala kan Gerwyn P. Enerlan, assistant professor han Economics ha UP Tacloban College Division of Social Sciences, maiha na nga naieksperyensyahan an pagluya han piso kontra dolyar, nga nagtikang dida han panahon han pandemya. Dugang pa niya, usa ha mga rason kun kay-ano maluya an piso kontra dolyar in mahitungod han gintatawag nga international reserves han dolyar ha nasud, nga nakakaapekto ha balyuay han piso kontra dolyar. Karuyag sidngon, kun mas damu an dolyar nga ginagamit ha pag-import hin mga produkto, mas hitaas an demand hini ngan mas napapaluya an piso.
Samtang, nakakaapekto gihap ha pagluya han piso an hitaas nga interest rate nga iginpatuman han Federal Reserve ha Estados Unidos tungod han ira naeksperyensyahan nga inflation. Tungod hini, mas ginpipili han mga investors nga ibutang an ira dolyar ha US agud makakuha hin mas hitaas nga tubo, nga nagigin hinungdan han pag-ubos han suplay han dolyar ha iba nga nasud, upod na an Pilipinas.
Samtang, usa ha mga dagko nga problema han nasud amo an panginahanglan hin dolyar ha pag-import hin krudo ngan iba pa nga produkto, labi na yana nga nagpapadayon an pagsaka han presyo han gasolina ha pankalibutan nga merkado.
Tungod hini, gin-aaghat ni Enerlan an mga panimalay nga magtipid ngan magin madiskarte ha paggasto. Ginpahinumdoman gihapon niya an publiko nga likayan anay an diri importante nga mga gastuson, mag-iban han konsumo hin kuryente, ngan unahon an mga panginahanglanon han pamilya antes an mga luho.
