TACLOBAN CITY – Ginkakabarak-an iton posible nga pagkulang hiton pampubliko nga sarakyan ha mga masunod nga mga bulan ha ruta hiton Marasbaras ha siyudad hiton Tacloban.
Sumala kan Leo Templado, BOD/Vice Chairman han Tacloban Marasbaras Drivers Operators Transport Cooperative (TAMADOTCO) nga posible mahitabo iton pagkukulang hiton sarakyan kun dire babag-uhon iton Local Public Transport Route Plan (LPTRP) nga ginpasa kumo final draft ha Department of Transportation dida han nakalabay nga tuig.
Ginmalatumat ni Templado nga kun dire babag-uhon an nasabi nga plano nga gin presentar han Land Transportation and Franchising and Regulatory Board, nga pag-convert hiton aada ha 130 multicab units nga nabiyahe ha Marasbaras ha 25 modernized units, in damo iton mga pasaheros an maapektaran sugadman iton mga drivers ngan operators. Nga kun diin, ha pag-iha, in posible nga magdara hin kakulangan hiton mga mabiyahe nga pampubliko nga sarakyan ha Marasbaras.
Ha pagkayana in nahulat pa hira hiton desisyon hiton konseho ngan naglalaum naman hiya nga tatagan hira hin tyansa nga makaghatag hiton ira concerns may paghisumpay hine.
