Gindig-onan ni Julienne Rose Peñaranda Saballa, Registered Guidance Counselor han DepEd Tacloban City Division ngan Guidance Coordinator III han Leyte National High School nga diri nangangaruyag sidngon nga magigin agresibo dayon an usa nga bata kun tagan hiya hin mulayan nga pusil.
Sumala kan Saballa, basar ha siyentipiko ngan evidence-based nga mga pag-aram, diri direkta nga nangangaruyag sidngon nga an paghatag hin mulayan nga pusil in magdudurot dayon hin agresibo nga panggawi o panhunahuna han usa nga bata. Samtang, may mga pag-aram nga konektado an paggamit hin mulayan nga pusil ha posible nga agresyon, pero padayon pa ini nga gindidebatehan han mga researcher.
Dugang pa niya, may-ada liwat mga pag-aram nga mas nakikit-an an association han sobra nga exposure ha video games ha agresibo nga behavior ngan panhunahuna han kabataan. Ginpahayag niya nga an paggamit hin mulayan nga pusil in posible liwat makita ha konteksto han role-play, sanglit diri la an mulayan mismo an kinahanglan tagan hin atensyon.
Para kan Saballa, importante an papel han mga kag-anak ha paggiya ha mga bata. Sanglit, kinahanglan ipasabut ha ira an eksakto nga konteksto, pananglitan, nga an pusil in ginagamit han mga pulis ha pagpatuman han balaud ngan pagpugong han krimen, imbes nga ihatag la an mulayan nga waray paggiya.
Ginduduso liwat niya an mga kag-anak ngan an guardian han usa nga bata nga tagan hin igo nga paggiya an kabataan ngan tagan atensyon an iba pa nga mga factor nga posible makaapekto ha agresibo nga behavior ngan panhunahuna. Dugang pa niya, kun kulang an paggiya, posible nga magkamay-ada hin diri eksakto nga pag-intindi an usa nga bata ha paggamit han pusil o ha iya nakikit-an ng mga videos online.
