TACLOBAN CITY – Maabot ha P7.6-M nga kantidad hin mga fisheries livelihood intervention an igin panhatag ni Presidente Ferdinand Marcos Jr. ha mga magkaduru-dilain nga asosasyon hin mga paru-pangisda ha rehiyon durante han paghatag han Presidential Assistance for Fisherfolks, Farmers and Families (PAFFF) dida han pagbisita hine dida han nakalabay nga Hulyo 4 ha Calbayog City ngan Palo, Leyte.
Sumala kan Christine Gresola, Information Officer hiton Bureau of Fisheries and Aquatic Resources (BFAR) Regional Office 8, sobra 500 nga mga parupangisda an makaka-benepisyo tikang ha 35 ka-unit hin 22-footer nga Fiber Reinforced Plastic (FRP) nga baluto nga mayda na kompleto nga accessories, 30 ka-units hin makina hin motor, gill nets, long lines, set hin magkaduru-dilain nga klase hin hook and line, usa kaset hin Lambaklad, ngan shallow water payao nga ginpanhatag naman pinaagi han Bureau of Fisheries and Aquatic Resources (BFAR) Regional Office 8.
Nanhatag gihapon hin cash assistance para ha mga pili nga parag-uma nga paru-pangisda nga naapektaran han El Niño ha rehiyon.
Samtang, kumarawat gihapon hin ceremonial checks tikang ha Presidente an mga gobernador tikang ha mga probinsya han Leyte, Southern Leyte, Biliran, Samar, Eastern Samar, ngan Northern Samar para makaghatag hin assistance ha mga parag-uma ngan paru-pangisda ha rehiyon.
