TACLOBAN CITY – Aprubado na an kadugangan nga P500 nga increase han Social Pension han mga Senior Citizens.
Sumala kan Ivan Malquez, Information Officer hiton Social Pension Program han Department of Social Welfare and Development Field Office VIII, pinaagi han Republic Act 11975 o pag-apruba han General Apropriations Act para han Fiscal Year 2024 in nadugangan an budget para ha Social Pension Program han mga kalagsan nga nagresulta naman hin pag umento han stipends nga makakarawat han mga senior citizens.
Dida han nakalabay nga tuig in tag-P500 kada bulan an nakakarawat han mga senior citizens pero tinikang yana nga tuig-2024 in magigin tag-P1,000 na an kada bulan han mga ine.
Padayon naman an schedule han release han buhatan nga kada katapusan hiton semester kun diin an syahan nga semester in natikang ha Enero kutob Hunyo ngan an ikaduha naman nga semester in tikang ha Hulyo kutob Disyembre.
Dugang pa han mao nga opisyal, tinikangan yana nga tuig in makarawat na an usa nga senior citizen hin P6,000 kada semestre, suma-total, P12,000 ha usa katuig.
Samtang, kaparehas han nakalabay nga tuig in an mga Local Government Units na han mga senior citizens an magbubutang hin schedule han payout ngan an pagproseso han mga dokumento nga kinahanglan igsumite.
Gin pasabot gihapon hine nga dida han nakalabay nga tuig in nakaghatag hira hin pondo ha mga Local Government Units para han Social Pension Program han mga senior citizens nga P1,695,000,027 ha bug-os nga rehiyon.
