TACLOBAN CITY– Ha pagsalin-urog han International Day of the Girl Child, iginharani han Rotaract Club of Tacloban an mga boses, proteksyon ngan katungod ha mga kabataan nga nag-eedad hin 6 ngada 19 anyos pinaagi han ira proyekto nga Project SHEroes, kun diin gindumara naman ine ha Barangay 60, Sagkahan, Tacloban.
An Projkect SHeroes in nagsirbe nga higayon agud nga magkamayda hin mahinungdanon nga paghihimangraw kasumpay ha ira pagtubo, pag-atiman ha kalugaringon panlawas, pagkilala ha mga personal nga limitasyon ngan pagtuo ha ira mga potensyal ha sosyodad.
Pinaagi han nasabi nga inisyatibo, ginkilala han grupo an paghahatag hin kusog ha mga bata nga babaye ha paghahatag han ira access ha sakto nga hibaro ngan pagkilala han ira kumonidad, ngan mahibaro nga tumukdaw ha ira kalugaringon nga tiil nga waray kahadlok.
Naghatag gihapon an nasabi nga programa hin dalan para paghisgutan an paghatag ha ira hin katungod, edukasyon ngan kusog, sugadman magin susbaranan nga mga kabataan, ngan kilal-on an ira kapasidad.
An usa nga aktibidad nga gintawag nga Empowered Manifestation in naghatag ha ira hin higayon nga igpahayag an ira mga personal ngan pangandoy, nga nagpapahinumdom ha kada partisipante nga an iya mga hingyap in angayan nga magkamayda hin espasyo agud rumibhong an ira kabubuwason.
