Gin palayas han Philippine Coast Guard (PCG) an usa nga Chinese fishing vessel ngan upat hini nga gudti na bangka mahuman masipatan ha territorial waters han Lawak Island o Nanshan Island ha West Philippine Sea.
Sumala kan PCG spokesperson Rear Admiral Jay Tarriela, pauru-utro nga ginprubahan han mga tawuhan han Coast Guard nga tawagan ha radyo an barko nga Yuetaiyu 63168 samtang nakaangkla ini ha lugar. Tulo kabeses gihapon nga lumibot ha palibot han barko an rubber boat nga ginsasakyan han mga tawuhan han PCG.
Han waray bumaton an Chinese vessel, ginpalayas han mga tawuhanm han Coast Guard an upat nga gudti nga bangka nga nakada ha palibot hini. Ha pag-iha, bumalik an mga ini ha mother vessel, nga nag-alsa han angkla ngan lumakat ha katubigan han Lawak Island. Waray naman nahipatilk nga insidente ha operasyon.
Gintagan-duon ni Tarriela nga kaparte han munisipalidad han Kalayaan, Palawan an Nanshan Is;and ngan dire pwede mangisda an mga langyawanon nga sarakyan-pandagat ha territorial waters han Pilipinas hin waray katugutan.
Subay ha PCG, an paggamit han gudti nga bangka tikang ha usa nga Chinese mother vessel agud magdumara hin pangingisda ha nasabi nga katubigan in pagtalapas ha balaod han Pilipinas, kaupod an Philippine Fisheries Code ngan Philippine Maritime Zones Act.
