Ginkonsiderar ni Dr. Cesar A. Silay, dean han ACLC Tacloban City, nga usa nga pitad ha pagproteher han mga kabataan an panukala nga magbabawal ha mga menor de edad nga gumamit hin social media, tungod han mga peligro nga posible maeksperyensyahan ha online platforms.
Ini in kasunod han mga panukala nga iginpasaka han mga magbaralaud dida han Oktubre 9, 2026, nga nakapokus ha pagbawal han paggamit han social media han mga menor de edad. Lakip ha mga panuyo hini an pagproteher ha mga kabataan tikang ha cyberbullying, online exploitation, mga problema ha mental health ngan sobra nga paggamit han social media, samtang ginsisiguro an ira katungod ha impormasyon, komunikasyon ngan edukasyon, pati gihapon an responsable nga paggamit han teknolohiya.
Sumala kan Silay, importante nga masabtan anay han publiko an panuyo han ginduduso nga panukala ngan kon paonan-o ini makakabulig ha seguridad ngan kaupayan han mga kabataan.
Dugang pa niya, kinahanglan proteheran an emosyonal ngan mental health han mga kabataan, labi na kay diri pa bug-os nga an ira panhunahuna ngan pagdesisyon. Tungod hini, posible hira maimpluwensyahan han mga sulod nga ira nakikita ha social media ngan makurian ha pagkilala kon ano an maupay o nakakadaot ha ira.
Samtang, gin-aghat ni Silay an publiko nga sundon ngan usisahon an mga detalye han panukala nga ginduduso ha Senado ngan Kongreso agud masabtan an mga probisyon hini, an panuyuan ngan an posible nga epekto ha mga kabataan, labi na ha pagbalanse han ira proteksyon ngan katungod ha paggamit han teknolohiya.
