Ginpahayag ni Dra. Gloria Fabrigas, Acting Chief of Hospital han Tacloban City Hospital, nga waray pa ebidensya hin person-to-person transmission may kalabotan han ginkakabarak-an nga sakit nga pneumonic plague, sanglit diri pa angay magpadara ha kahadlok an publiko samtang nagpapadayon an mga imbestigasyon.
Sumala kan Fabrigas, ini nga sakit in gintatawag nga pneumonia of undetermined etiology kun diin waray pa natutudlok nga espisipiko nga hinungdan han sakit. Ginklaro niya nga waray pa ebidensya hin padayon nga pagsarang han sakit ha komunidad, sanglit diri pa ini angay tawagon nga outbreak.
Dugang pa niya, an ngatanan nga mga indibiduwal nga nagkaada hin contact ha apektado nga lugar in ginpailarum na ha testing ngan medical follow-up. Ha pagkayana, nagpapabilin nga waray sintomas o asymptomatic an mga indibiduwal nga ginmonitor.
Ginpabug-atan liwat ni Fabrigas nga diri pa angay maghimo hin konklusyon mahitungod han gintikangan han sakit, tungod kay kinahanglan pa ini hin mahugot nga pag-aram ngan laboratory investigation. Ginklaro niya nga bisan may mga impormasyon nga may koneksyon han sakit ha laboratoryo, kinahanglan pa ini mapamatud-an pinaagi han kaangayan yan nga ebidensya.
Ha pagkayana, gin-aghat ni Fabrigas an publiko nga magpabilin nga kalmado ngan likayan an pagpasarang hin mga impormasyon nga waray pa mapamatud-i. Sumala ha iya, usa pa la an dokumentado nga kaso nga tikang usa nga research institute ha Russia, sanglit importante nga maghulat han opisyal ngan beripikado nga impormasyon.
