Ginpabug-atan ni Julienne Rose Peñaranda-Saballa, Registered Guidance Counselor ha DepEd Tacloban City Division ngan Guidance Coordinator III han Leyte National High School (LNHS), an importansya han paghatag hin atensyon ha mental health diri la durante han World Mental Health Day kundi ha bug-os nga bulan han Oktubre.
Sumala kan Peñaranda-Saballa, an Oktubre in ginkikilala komo World Mental Health Month, kun diin may oportunidad an ngatanan nga mag-istorya may kalabotan ha mental health.
Ginklaro niya nga an mental health diri la para ha kabataan. An mental health in usa nga pamaagi han paghunahuna, pag-abat o emosyon, ngan kon paonan-o ini nga mga butang nakakaapekto ha pamatasan ngan gios han usa ka tawo. May-ada liwat upat nga aspeto nga nakakaimpluwensya ha mental health, nga amo an biological, psychological, social ngan spiritual factors.
May kalabotan ha nagtitikadamo nga mga insidente han violence ha mga eskwelahan, ginpabug-atan ni Penaranda-Saballa nga diri ini angay igbasol ha usa la nga hinungdan, tungod kay damu an magkadurudilain nga mga rason, pareho han palibot, relasyon ha kag-anak ngan kasangkayan, impluwensya han social media, ngan iba pa nga aspeto han kinabuhi.
Dugang pa niya, mas daku an posible magin epekto hini ha kabataan tungod kay aada pa hira ha proseso han pagtubo ngan pagdevelop, sanglit mas masayon hira maimpluwensyahan han mga butang ngan mga tawo ha ira palibot. Tungod hini, importante an paggiya ngan pagsuporta ha kabataan agud maproteheran an ira mental health ngan mabuligan hira ha pag-atubang ha mga ayat han kinabuhi.
