Gin pahuru-hugot han Philippine National Police (PNP) an mga pitad pan-seguridad hini agud proteheran an ira mga importante nga impormasyon ngan mga operasyon kasunod han pagkaka-aresto han 76 nga mga foreign nationals ha usa nga Philippine Offshore Gaming Operators (POGO)-related facility ha Cubao, Quezon City.
Sumala kan PNP Chief General Jose Melencio Nartatez Jr., dire ginbabalewaray han PNP an anuman nga posible nga hulga han pan-iispiya, ngan ginbubuhat nira an ngatanan han mga pitad agud mapugngan an pagsulod han mga langyawanon nga espiya ha mga sistema han pulisya ngan maproteheran an nasyunal nga seguridad.
Sumala pa kan Nartatez, padayon an ira pakikipagsumpayan ha iba nga mga ahensya agud mapakusog an seguridad kaupod na an legal ngan institutional frameworks para ha pagprotekta ha national security tikang ha posible nga hulga.
Samtang, gin iimbestigahan na gihapon han pulisya kun mayda koneksyon an operasyon ha Cubao ha kaparehas nga POGO hub ha Zamboanga Sibugay, nga may-ada 244 nga mga langyawanon gihapon nga naaresto dida han syahan nga parte han bulan.
