TACLOBAN CITY – Nagtutuo an pira nga grains retailers ha rehiyon nga posible nga matabo an P20 nga presyo han kada kilo han bugas nga patapod ni President Bongbong Marcos kun maghahatag hin subsidiya an gobyerno para ha mga parag-uma ha nasud.
Sumala kan Frederick Dy, presidente han Grains Retailers Confederation ha rehiyon, ha iya pagkita kutob la ha P35 an pwede nga maging pinakahabubo nga presyo han kada kilo hiton bugas tungod nga dako an gingagasto han mga parag-uma ha ira pagtanom ha pagkayana.
Pero kun igsusubsidize naman daw han gobyerno an mga kinahanglan ngan garamiton han mga rice farmers ha ira pag-uuma, posible nga matabo an P20 per kilo nga presyo han bugas.
Lakip na hini an pagsubsidize han mga fertilizers, panhatag hin mga binhi ngan manpower sugadman pagpasuhol ha pagtatanom.
Kinahanglan gihapon daw nga magbiling hin epektibo nga pamaagi an gobyerno ha pagdistribwer han mga binhi tungod nga ha pagkayana in nakikita nira nga dire maupay an ginbubuhat nga sistema han gobyerno ha distribusyon han mga ini ha mga parag-uma.
