TACLOBAN CITY – Magigin epektibo na tinikangan yana nga Dominggo an P1 nga dugang-pasahe ha ngatanan nga pampubliko nga transportasyon ha bug-os nga nasud.
Sumala kan Veronica Reposar, Transportation Development Officer ll hiton Land Transportation Franchising and Regulatory Board (LTFRB) Regional Office Vlll, ine nga dugang-pasahe in provisional fare increase o temporaryo la daw sanglit dire hira maghahatag hin taripa hine.
An tinuod daw hine nga petisyon in P5 nga dugang ha pamasahe pero padayon pa an hearing kasumpay hine sanglit para daw matagan hin guti nga bulig an mga drivers ngan operators in nagpatuman la anay iton LTFRB hin P1 nga provisional fare increase.
Kasunod hine in posible pa naman daw dire la P1 an ighitaas han pamasahe kundi mahitaas pa ine ngan amu an magigin permanente na nga pamasahe hiton mga pampubliko nga sarakyan.
Kaupod naman ha nasabi nga dugang-pasahe an ngatanan nga traditional ngan modern PUJs ngan FilCab kun diin igpapatuman la ine ha syahan nga upat kakilometro ngan waray naman na dugang ha mga masunod pa nga kilometro.
An anay P12 nga pasahe ha mga PUJs ngan FilCab in magigin P13 na pag-abot yana nga Dominggo.
