TACLOBAN CITY – Gin klaro han Office of the Vice President pinaagi kan Office of the Vice President Eastern Visayas Satellite Manager, Alan Tanjuakio nga uusa la nga yunit han bus an mabiyahe ha syudad han Tacloban para han Libreng Sakay.
Ine in mahitungod han mga hurob-hurob nga daw mayda pa maabot nga kadugangan nga yunit hin bus para maghatag hin Libreng Sakay.
Nagbaton gihapon an nasabi nga buhatan kaparte han surat nga igin padara han NORBATCO ha Office of the City Mayor may paghisumpay ha daw paghinay han ira pasada ngan kita mahitungod han libre nga panakayan.
Sumala kan Tanjuakio, dapat in malipayon unta an ngatanan para hine nga libre nga panakayan mahitungod nga damo nga molupyo an nabubuligan hine, labi na adton mga nagkukulang ha igparasahe.
Dugang pa hine, panuyo nira nga mabuligan an mga manarakay sugad han mga istudyante ngan kalagsan nga nagkukulang hin pag-gastos ha kada adlaw.
Waray naman daw an ira opisina problema ha mga public transportation mahitungod nga ha kamatuuran daw, an mando ha ira in paunahon an mga ine ha pagpasakay hin mga pasaheros, dire gihapon hira pwede makig-agaw hin manarakay ha mga ine.
Sanglit, mayda daw iba nga linya para han Libreng Sakay ngan iba liwat nga linya para han mga public transportation.
Pero ha kaluyo hine in mayda gudman pipira nga manarakay nga nahulat la ha pag-aagi han Libreng Sakay, labi na adton karuyag makatipid ha pasahe.
Samtang, waray daw gihapon hira nakuha nga negatibo nga komento o pakaraot ha nasabi nga programa, lugod in mga pasalamat daw an ira mga nakakarawat.
