TACLOBAN CITY – Usa nga public hearing an gindumara dida han nakalabay nga adlaw kun diin ginduduso an usa nga ordinansa kasumpay han pag-implementa han Tricycle Route Plan o mga ruta nga pwede agian han mga tricycle ha sulod hiton syudad han Tacloban.
Sumala kan Hon. Leo Bahin, Head hiton Committee on Transporation ngan City Councilor hiton Tacloban City, an nasabi nga ordinansa in masakop ha operasyon han mga tricycles, motor, pedicab, ngan electric vehicles, ha pampribado o pampubliko nga paggamit.
Igindidire an pag agi ha mga masunod nga ruta; Daang Maharlika (tikang ha Naga-Naga tikadto ha corner Picas Road); Daang Maharlika (tikang ha Angelicum Rotunda tikadto ha Caibaan Exit Road); Tacloban – Baybay South Road (tikang ha Coca-cola Rotunda tikadto ha City Hospital Road); Real Street (tikang ha Coca-cola Rotunda tikadto ha Noblejas Junction); Justice Romualdez Street; Rizal Avenue; ngan Avenida Veterano Street.
An mga alternatibo nga ruta naman in an mga masunod; Daang Maharlika (tikang ha Naga-Naga tikadto ha San Juanico Bridge); Tigba-Caibaan Bypass Road; Tigbao – Sta. Fe – San Miguel Road; Tacloban – Babatngon Road; Naga-Naga – Anibong Road; Daang Maharlika (tikang ha Caibaan Exit Road tikadto ha Tacloban – Palo Boundary); Benjamin Romualdez Diversion Road (tikang ha Corner Picas Street tikadto ha Coca-cola Rotunda); Tacloban – Baybay South Road (tikang ha City Hospital Road tikadto ha Tacloban – Palo Boundary); Picas San Jose DZR Airport Road (tikang ha Coca-cola Rotunda tikadto ha DZR Airport Boundary); Caibaan Road; Calanipawan Road; Burgos Street; Esperas Avenue; Sergio Osmeña Avenue; Ninoy Aquino Avenue; Avenida Veteranos Extension; Magsaysay Boulevard; ngan Trece Martires Street.
Gintutugot naman an pag agi ha mga alternatibo nga ruta labi na kun waray na gud iba nga ruta nga pwede agian an tricycle. Sugadman in mayda gihapon mga kondisyunes ha pag agi ha nasabi nga ruta sugad han: pag-agi ha outermost lane han highway ngan pwede la gumamit han inner lane kun ma-overtake o mayda lalahusan nga nakaparada nga sarakyan; pag-obserba han kadamo han pasaheros ngan pagsukot han sakto la nga pamasahe; ngan paghirot samtang nagbibiyahe para ha seguridad han pasaheros ngan driver.
Dugang pa han nasabi nga opisyal, pwede naman umagi ha mga national highways ha oras hiton mayda emergency o kalamidad, durante han regulated hours tinikangan hiton alas-6 hiton aga kutob alas-9 hiton aga ngan alas-4 hiton kulop kutob alas-7 hiton gab-i ha panuyo han pagkadto ngan pag-uli tikang ha trabaho kun pribado nga tricyle ngan kun magarahi na.
Maghahatag naman hin garage sticker an TOMECO kun diin ha nasabi nga sticker in nakasurat an lugar han gagarahian han tricyle agud mahisabtan kun nagbubuwa an driver o dire.
