TACLOBAN CITY — Ginkumpirma han Department of Social Welfare and Development (DSWD) Region 8 nga mayda pira nga mga benepisyaryo han Pantawid Pamilyang Pilipino Program 9 (4Ps) an gintanggal ha listahan mahitungod han pagtalapas han mga patakaran han programa.
Subay ha ahensya, tikang han target nga 251, 000 nga pamilya ha Sinirangan Bisayas, ada ha 208,000 nala an aktibo nga natatagan hin bulig.
Gin-esplikar pa ni DSWD 8 Regional Director, Grace Subong, nga an mga natanggal in dire nasunod han ira mga responsibilidad kumo benepisyaryo, sugad han mali nga paggamit han ayuda.
Pipira gihapon nga miyembro han 4Ps program an ginagasto an nakakarawat nga suporta tikang han programa para ha magkadiro-dilain nga bisyo, imbes nga ig-alutaga para ha edukasyon ngan katalwasan han mga anak, nga pangunahon nga panuyuan han programa.
Dugang pa, an mga benepisyaryo in basar ha National Household Targeting System for Poverty Reduction o Listahanan, usa nga sistema nga ginagamit agud tudlukon an mga tinuod nga kablas ngan dapat buligan.
Ha lain nga bahin, nananawagan an publiko nga mas pahurohuguton pa an monitoring ngan validation agud masigurado nga sakto o deserving nga pamilya an mabubuligan han Pantawid Pamilyang Pilipino Program o (4Ps).
