TACLOBAN CITY – Nagdumara hin Oplan Galugad-Linis Piitan an mga otoridad kakulop nga adlaw, Hunyo 29, ha Tacloban City Jail Male Dormitory.
An nasabi nga aktibidad in inisyatibo tikadto han talwas ngan drug-free nga presohan.
Sumala kan Tacloban City Jail Warden Male Dormitory, JCInsp. Jim Buranday, nagdudumara hin inadlaw nga greyhound operation o “pag-galugad” an ira buhatan pero napili la hira hin random nga selda nga ira papanginuon, pero an operasyon nga kaupod na an iba nga ahensya sugad han Bureau of Fire Protection ngan Philippine Drug Enforcement Agency in binulan nira nga ginbubuhat.
Waray naman may nakuha nga mga igindidire nga kontrabando sugad han droga, makahurubog nga irimnon, ngan sigarilyo ha sulod han mga selda, pero nakakuha an mga ine hin sugad han lata hin sardinas o an gintatawag nga “nuisance contrabands.”
Sumala pa kan JCInsp. Buranday, ha kamatuuran daw in prone ha paglabay o pagsulod hin mga kontrabando an ira presohan mahitungod nga dire gud ine sugad ka-secured ngan kulang gihapon ha kagamitan sugad hiton scanner x-ray machines o bisan K9 dogs.
Kaurugan in na-rely na hira ha ira mga personahe ha panginano han kada masulod o madalaw ha mga presohan.
Mahugot gihapon nira nga ginpapatuman ngan ginpapahibaro ha mga “dalaw” ngan Persons Deprived of Liberty (PDLs) nga dire gud magprubar pagsulod hin mga kontrabando mahitungod nga mayda an mga kakaatubangon nga kaangayan nga sirot.
