TACLOBAN CITY – Padayon an ginbubuhat nga assessment han Office of Civil Defense (OCD) Regional Office 8 ha kabug-usan nga naging danyos nga naidurot nga pagbabaha ha damo nga mga bungto ha rehiyon tungod han malain nga panahon.
Sumala kan Rayden Cabrigas, tagapagyakan han OCD 8, subay ha ira inisyal nga monitoring han naglabay nga adlaw sobra ha 80 nga mga barangay tikang ha walo nga mga bungto ha probinsya han Leyte an nakaeksperyensya hin lapos tuhod nga baha tungod an waray hunong nga pag-inuran durot han tail-end of frontal system.
Kalakip ha mga lugar nga ginbaha amo an mga bungto han Palo, Tanauan, Alangalang, Dulag, San Miguel, Sta. Fe, Tabon-Tabon, La Paz ngan iba pa.
Posible pa nga madugngan an ihap hini ha padayon nga monitoring han OCD pati na gihapon ha Samar areas.
Una naman nga nagpatuman hin pre-emptive evacuation ha pira nga mga bungto ngan umabot ha ginatos-gatos nga pamilya an ginpanbakwit.
Naging unpassable gihapon kakulop nga adlaw an Palo- Carigara- Ormoc Road, Mainitit – San Miguel Santol Road, Maharlika Daan, TigbaoPulak- Sta Fe road, Buenavista – Lawaan Road ngan Arteche – Jipapad – Las Navas – Rawis nga dalan.
Ha pagkayana in passable na an mao nga dalan mahuman nga humubas an tubig baha.
Utro naman nga nagpahimatngon an mao nga opisyal ha publiko nga maginga andam ha oras hin kalamidad labi na gud adton mga nag-uukoy ha mga landslide ngan flood prone areas.
Nanawagan gihapon ini nga dire tumuod ha mga fake news ha social media lugod in magbase ha mga impormasyon tikang ha mga otorisado nga mga ahensya.
