TACLOBAN CITY– Padayon an ginhihimo nga monitoring han Office of the Civil Defense OCD Eastern Visayas, ha bug-os nga rehiyon kasumpay han waray hunong nga pag-inuran ka-kulop nga adlaw nga nagresulta hin pagbabaha ngan pagpanpan hiton tuna.
Sumala kan Office of the Civil Defense, Information Officer Sher Rysiah Saises, nakapagtala hira hin mga report kun diin lumos la gihapon ha tubig-baha an pira nga mga lugar, sugad han 2 nga munisipalidad ha Northern Samar, 10 ha Leyte, 3 ha Samar, ngan 9 naman ha Eastern Samar.
Dugang pa ni Saises, nakapagtala naman an ira buhatan hin mga landslide report kun diin 5 an ira naitala ha Leyte, ngan 1 naman ha Eastern Samar.
Ginpaangbit pa hine nga umabot ha 30,427 families o 82,143 individuals an apektado ha nasabi nga pag-uran dara hiton shearline, ngan posible pa ine nga madugangan.
Ha nasabi nga ihap 2, 552 families o 8, 547 nga individuals naman ha bug-os nga rehiyon an nag-evacuate.
Samtang, naka-isa la gihapon an advisory ha pantalan han Northern Samar, kun diin ginpapagbawalan la anay nga magpalawod an mga gugtiay nga sakayan pandagat.
Ha pagkayana, padayon pa an ginhihimo nga assestment han buhatan, agud nga matudlok gihapon an epekto ngan danyos nga ginbayaan ha sektor hiton agrikultura.
