TACLOBAN CITY – Ginseselebrar yana nga bulan han Hulyo an ika-51 nga Nutrition Month ha bug-os nga nasud.
May-ada ine tema nga “Sa PPAN: Sama-sama sa Nutrisyong Sapat Para sa Lahat!”, ngan may-ada naman subtheme nga, “Food at Nutrisyon Security, Maging Priority! Sapat na Pagkain, Karapatan Natin!”.
Sumala kan National Nutrition Council Eastern Visayas Program Coordinator, Dr. Catalino P. Dotollo Jr., an nasabi nga tema in naghahatag-duon ha papel han pagkaon ha paguurusa han mga katawhan, pagselebrar han kultura, ngan pagbaton ha mga ayat sugad han kakulangan hin seguridad ha pagkaon.
Gintatagan-duon gihapon hine an seguridad ha pagkaon ngan nutrisyon kumo pangunahon nga katungod-pantawo.
Nakapukos naman an subtheme han Nutrition Month ha national framework han nutrisyon ha pag-iban han ngatanan nga klase han malnutrisyon—tikang ha under nutrition, over nutrition, ngan micronutrient deficiency.
Ada ha ilarom han under nutrition an stunting o bansot ngan wasting o magasa, samtang, kalakip naman ha over nutrition an overweight ngan obesity, ngan ha micronutrient deficiency naman in kakulangan hin nutrisyon sugad han pagkukulang hin bitamina, Iron-deficiency anemia o kakulangan hin red blood cells, ngan iodine deficiency.
