Iginduon han National Maritime Council (NMC) nga an 1990 Scarborough Shoal document nga ginagamit han China agud suportahan an pag-angkon hini ha Bajo de Masinloc in tikang ha “doubtful source” ngan ginagamit agud lipungon an publiko.
Sumala kan NMC Spokesperson Alexander Lopez, an nasabi nga dokumento in iginpagawas hin waray ha sakto nga konteksto agud pakusgon an naratibo han Beijing ha gin aagawan nga kadagatan.
Igin eksplikar hini nga an surat in ginsurat han anay ambassador han Pilipinas ha Germany kumo baton la ha pakiana han usa nga amateur radio group, ngan waray ini sakto nga otoridad agud magtudlok hin territorial claims.
Dugang pa ni Lopez, dire klaro an gintikangan han dokumento ngan dire ini pwede gamiton agud ibanan o tanggalon an soberanya han Pilipinas ha Bajo de Masinloc.
Gin pahayag gihapon hini nga an presidente la han Pilipinas an mayda kapas nga magdeklara han opisyal nga posisyon kasumpay ha istoryahon han soberanya.
Syahan na nga ginamit han China an pira nga parte han surat nga nagpapahayag nga an Bajo de Masinloc in ‘waray teritoryo han Pilipinas kundi ada ha sulod la han 200 nautical miles exclusive economic zone (EEZ) han nasud.’ Pero subay ha NMC, ini in pili nga interpretasyon la nga pabor ha parte han China.
Iginduon pa han NMC nga nagpapabilin nga “long-standing, consistent, ngan indivisible” an pag-angkon han Pilipinas ha Bajo de Masinloc, nga subay ha international law kaupod an United Nations Convention on the Law of the Sea ngan an 2016 arbitral ruling nga nagbasura ha haluag nga claims han China ha West Philippine Sea (WPS).
Dugang pa han konseho, padayon nga iginpapakita han Pilipinas an epektibo nga kontrol ha lugar pinaagi han law enforcement operations, marine scientific research, ngan military exercises.
Samtang, ginhuhulat pa han NMC an kompleto nga report tikang ha Philippine Coast Guard nga magseserbi nga basaranan para ha posible nga pagsasalawad hin diplomatic protest kontra ha China kasumpay han ilegal ngan mapan-abuso nga ginbubuhat hini ha WPS.
