TACLOBAN CITY — Padayon nga gin-aaghat han National Irrigation Authority (NIA) Regional Office 8 an mga parag-uma nga magparehistro agud nga makabenepisyo han Free Irrigation Service Act (FISA) han gobyerno.
Sumala kan Engr Jojo Arceño, Engineering & Operation Division Manager NIA Region 8, kinahanglan nga magparehistro han mga parag-uma nga nagtatag-iya hin tuna nga 8 hectares paubos agud nga makalibre han irigasyon ngan ma kondinar ha iba pa nga kabaraydan sugad han back accounts ngan penalties.
Ginkikinahanglan la han mga ini nga mahaupod ha listahan han Registry of Farmers kun diin nakabutang an ngaran han landowner, lokasyon, kadako han tuna ngan an detalye han original Certificate of Title.
Samtang an mga nagtatag-iya naman hin tuna nga 8 hectares pa igbaw in obligado la gihapon nga magbayad hin irrigation service fee ngan iba pa nga kabaraydan.
Mababaruan nga an mao nga Free Irrigation Service Act (FISA) in pira na ka tuig nga programa han gobyerno nga ginbugos para ha mga gudti nga parag-uma ha nasud.
