TACLOBAN CITY – Ginpatapod han National Housing Authority (NHA) Region 8 nga matatauran na hin kuryente an Sangyaw Village ha Brgy. 108 Tagpuro , syudad han Tacloban.
Una hini, ginrereklamo han mga benepisaryo han mao housing project nga humagos na hin lima katuig pero waray la gihapon hira katatauri kuryente.
Sumala kan Constancio Atinierro, Regional Manager han NHA 8, an mao nga pabahay in para ha mga uniformed personnel ha AFP ngan PNP nga dire akos makagtindog hin ira kalugaringon mga panimalay.
Nangaro naman hin dispensa an NHA ha mga benepisaryo bahin han pagkalangan han pagtaud hin kuryente ha mga housing units.
Ginklaro ni Atinierro nga ha pagkayana in mayda pa kinahanglan nga igcomply an ira developer ha LEYECO ngan kinahanglan pa gihapon nga mapinalisa an memorandum of agreement (MOA).Ginsiguro naman hini nga dire pa mahuhuman yana nga tuig, magkakaada na hin suplay hin kuryente an Sangyaw Village.
