TACLOBAN CITY – Nahuman na an gin iinayad nga farm to market road ha New Kawayan tikadto ha Sto. Niño ngan lahos ha Sta. Elena, ha may norte nga parte han syudad han Tacloban.
Sumala kan Tacloban City Agriculture’s Office Head, Romelo Anade, gin pondohan an nasabi nga proyekto pinaagi han Agrarian Reform Fund mahitungod nga usa nga agrarian area an nasabi nga lugar.
Kun diin mga agrarian reform beneficiaries an nakatagamtam durante han panhatag han tuna han Comprehensive Agrarian Reform Program han Department of Agrarian Reform Regional Office VIII.
Sumala pa hine, dako nga bulig an nasabi nga karsada ha mga residente ngan parag-uma ha nasabi nga lugar mahitungod nga ugsa pa ine nga proyekto in waray karsada ha nasabi nga lugar, sanglit nakukurian an mga residente ha pag-dara han iya mga baligya ngan nadi-discourage gihapon an iba ha pagtanom mahitungod ha kakuri han aragian.
Ha pagkayana in nagpapadayon pa naman an nasabi nga karsada para liwat ha paglahos ha may Camansihay nga dapit.
