TACLOBAN CITY – Magpoprobar an negosyante ngan bagito ha pulitika hi Bernandino “Bernie” Tacoy nga bangga-on an 34 anyos nga liderato ni Mayor Michael Torevillas ha bungto han Matag-ob, Leyte.
Kakulop, Oktubre 3, nagsalawad hin Certificate of Candidacy (COC) pagka-mayor ha opisina han Comelec ha Matag-ob, Leyte hi Tacoy kaupod an bug-os hini nga linyada tikang ha partido nga Laban ng Demokatikong Pilipino (LDP).
Magigin runningmate ni Tacoy an iya anak nga hi Vincent Lynbern nga nakandidato kumo bise mayor.
Hi Vincent in 26 anyos ngan naggradwar hin business administration ha Western Leyte College dida han 2019 ngan makatugbang hini iton incumbent nga bise mayor nga hi Bushi Torevillas, anak ni Mayor Michael Torevillas.
Sumala kan Tacoy nakandidato hiya ha tinguha nga kaupayan ngan pagbabag-o ha bungto han Matag-ob.
“Diri kinahanglan nga tuminungnong ka ha usa kalugar importante you have the desire to serve”, pamahayag hini ha usa nga interview.
“Waray kami political experience pero ugali namon pulitiko kay madugay na kami nga matinabangon”, kadugangan hini nga pamahayag han ginpakianhan kabahin han pagigin bagito ha pulitika.
Antis hira nagsalawad han ira COC, nagkaada anay hin misa ngan usa nga motorcade nga gintambungan hin masobra 800 nga mga supporters.
