TACLOBAN CITY – Gin malatumat ni Former Samar 1st District Representative Edgar Mary Sarmiento nga waray pa klaro nga direksyon an dalagan han impeachment trial ni Vice President Sara Duterte.
Sugadman, in naglalakaton na an kaso tikadto ha unod hini grave threats nga gin aalegar ginbuhat han Bise Presidente.
Dugang pa ni Sarmiento, kinahanglan mabatian han katawhan an kamatuoran ngan maklaro an pag-plastada han mga ebidensya agud maintindihan gihapon han publiko.
Gindedebatehan manggud han depensa ngan prosekusyon an Article IV han Articles of Impeachment nga ginpasaka kontra ha bise presidente, kun diin nakasentro ini ha gin aalegar grave threats nga ginbul-iwan ni VP Duterte dida han Nobyembre 23, 2024 nga daw mayda na hiya ginbayaran nga hitman nga mapatay kanda PBBM, First Lady Liza Marcos, ngan anay house speaker Martin Romualdez ha oras nga may-ada mahitabo nga maraot ha iya.
Mababaruan nga nagtikang an impeachment trial kontra kan Vice President Sara Duterte dida han Lunes, Hulyo 6 ngan utro nga magpapadayon ha maabot gihapon nga Lunes kutob naman ha kahuman hini.
