TACLOBAN CITY – Gindumara kakulop nga adlaw, Enero 31, an Nationwode Job Fair ha pangunguna han Department of Labor and Employment (DOLE) Regional Office VIII ha usa nga mall ha syudad han Tacloban.
Ada ha sobra 500 nga mga job vacancies an gin abrihan tikang ha 29 nga magkaduru-dilain nga ahensyan han gobyerno ngan pribado nga sektor nga namimiling hin mga empleyado.
Sumala kan DOLE Region 8 Assistant Regional Director, Norman L. Uyvico, an nasabi nga aktibidad in usa nga inisyatibo han DOLE kaupod an mga lokal nga ahensya, kun diin daw ine in baga-baga hin usa nga purtahan nga gin abrihan para ha mga job seekers agud makaghatag hin oportunidad nga makabiling hin trabaho ngan maibanan an unemployment rate ha rehiyon.
Presente naman ha nasabi nga aktibidad an pira nga ahensya han gobyerno para han madagmit nga pagkuha han mga rekisitos, sugad han Pag-IBIG, Social Security System, PhilHealth, Department of Foreign Affairs, ngan Philippine Statistics Authority.
Gin abrihan gihapon an Kadiwa ng Pangulo nga nagbabaligya hin mga abot-kaya nga papliton ha mga katawhan.
Samtang, kadungan han aktibidad in nagkamay-ada gihapon hin TUPAD payout ngan turnover han 16 nga cheke para ha mga Livelihood Beneficiaries Program Pangkabuhayan Corp, tikang ha magkaduru-dilain nga munisipalidad ha Southern Leyte, sugad han Silago, Sogod, St. Bernard, Sta Filomina, ngan iba pa. (via Bombo Niña Magpili)
