CATBALOGAN CITY – Naipit han duha nga bus an usa nga sarakyan han internet service provider kakulop nga adlaw, Pebrero 26, ha may Brgy. Payao Catbalogan City.
Sakay han duha nga bus an mga atleta han delegasyon han Calbayog Supersonics tikadto ha Baybay City para han Eeastern Visayas Regional Athletic Association (EVRAA) Meet 2026.
Sumala kan Catbalogan City Police Station Chief of Police, PLtcol Norman Ala, ‘miscalculation’ an nahitabo mahitungod nga dire man malaksi an padalagan han mga sarakyan.
Dugang pa hini, kun tikang ha Calbayog an sarakyan in may pagka-hitaas an lugar, samtang kun tikang ngani ha Catbalogan in may pagka-hamubo ngan kurbada; katadungan gihapon an lugar sanglit mag-gigikita an mga ini.
Hadto nga oras gihapon in mayda nagdidiskarga nga truck ha unahan, sanglit dida han pag-undang han nauuna nga bus in umundang gihapon an nasunod nga sarakyan, pero waray ini umigo ha bus, ngan an ikaduha nga bus nga nakada ha likod han sarakyan an nakaduso hini sanglit nasuksok ini ha nauuna nga sarakyan nga nagresulta han mga guba hini.
Samtang, talwas naman an ngatanan han sakay han bus ngan nakaabot ha Baybay City kakulop.
