Milyones nga kantidad hin nadudunot nga relief items nga para unta ha mga Yolanda victims, nadiskubrehan ha Kananga, Leyte

107
-- Advertisements --

TACLOBAN CITY – Milyones nga kantidad hin relief items nga nakatalaan unta nga ipanhatag ha mga biktima han supertyphoon Yolanda an nadiskubrehan ha nakatago nga parte han usa nga gymnasium ha Kananga, Leyte.

Sumala kan Atty. Adelito Solibaga, municipal administrator ng Kananga, Leyte, nadudunot na han makit-an an yinukot-yukot nga mga relief items sugad han canned goods, bado ngan iba pa nga food items ngan sugadman an expired nga mga medisina nga nakatago ha mao nga gym.

Labot pa hini in maabot gihapon ha P8 million nga kantidad hin school supplies an ira nadiskubrehan.

Nahisabutan gihapon han presente nga administrasyon han Kananga nga para unta an mga ini ha mga Yolanda victims ha ira lugar ngan an school supplies in procurement han nakalabay nga administrasyon ni anay Mayor Rowena Codilla nga bisan liquidated na an mga ini in dire naman tinuod nga naipanhatag ini ha mga benepisaryo.

Ha pagkayana in padayon nga gin-iimbestigaran han mga otoridad kun hino an nagpapaluyo han pagtatago han milyones nga kantidad hin relief goods ngan school supplies nga dako na unta nga bulig para han mga nadarahigan han bagyo.