HINUNANGAN, SOUTHERN LEYTE – Ginamit han mga Environmental Science students han Southern Leyte State University Hinunangan Campus an wati o African night crawler kumo kabulig ha paghimo hin vermicast fertilizer o organic nga abono nga nabulig agud mapaupay an tubo han usa nga tanom .
An vermicomposting in usa nga pamaagi hin paggamit hin wati, kun diin ginkakaon han mga wati an mga organic materials sugad han dahon, mga linabog nga puno hin saging, ngan bisan baya hin karabaw kun diin an resulta hini in gintatawag nga vermicast.
Sumala kan Southern Leyte State University – Hinunangan Campus Director and Professor, Dr. Ian Navarrete, an trabaho han mga wati in magkinaon han mga gintutubong nira nga organic materials ngan an resulta hini nga vermicast in amu naman an ira ginbabaligya ngan ginpapanhatag ha mga parag-uma.
Dugang pa hini, mayda na gidaan pasilidad para han vermicomposting an iskuylahan han dida pag-ulpot pero waray gud ini kagagamit mahitungod nga waray nago-operate.
Mahitungod han iya kyuryusidad, nagtutdo hiya hin Soil Biogeochemistry nga kurso ha iskuylahan kun diin gin ayat niya an iya mga istudyante han Environmental Science nga program nga mag-eksperimento han vermicomposting.
Pag-istorya pa ni Navarrete, ha syahan in waray tutugot an iya mga istudyante mahitungod han wati, pero samtang nagkakamay-ada hin progreso an ira eksperimento in mas nalilipay ngan nahibabaro na an mga istudyante han importansya ngan nahibubulig han wati.
Ginmalatumat gihapon han propesor nga dako an naibubulig han mga wati mahitungod nga labot la nga nakakabulig ini kumo abono han tuna in nabulig gihapon ini ha pag-iban han mga organic nga basura ha kalibungan.
