NATIONAL – Iginpatapod han Philippine National Police nga lalanaton nira an mga vlogger ngan content creator nga nagpapasarang hin mga sayop nga impormasyon ha online.
Lakip na dinhi an naghihimo hin mga video o prank sugad han krimen ngan disgrasya nga ginpapagawas nga baga hin tinu-od.
Sumala kan PNP Chief Police General Nicolas Torre III, ini in mahuman nga magviral an usa nga video ha social media kun diin kuntaloy in mayda natabo nga holdapan ha bus ha Cebu.
Dugang pa ni Torre, ginrerespeto niya an kalayaan han pagpapagawas hin pahayag han kada tagsa, pero kinahanglan nga an mga materyales in diri nagdudurot hin kahadlok, pagkabaraka, ngan danyos ha kinabuhi han publiko.
Apela naman han hepe han PNP, magin responsable ha paghimo hin content ha social media agud diri mabutang ha peligro an seguridad han katawhan.
